حوار حزين
عبد الله العاصم

إليكم نص حوار (مأساوي) نقله لي صديق مقرب من صاحب الفلة التي ستعلمون تفاصيل قصتها في السطور التالية:
* والله مشكلة.. شكلي ما راح أقدر أكمل عمار فلتي.
- ليش؟
* أبدا.. شي بسيط، أسعار البنيان في يوم وليلة تغير سعرها!
- تغير.. شلون يعني؟ زاد.. نقص.
* هو فيه شي ينقص! كلش يزيد والله يستر.
- أخاف أن ذي الزيادة في مواد شكلية للتجميل والتزيين.
* الله يزين أيامك.. الزيادة في الحديد ومواد تمديدات المياه والصرف الصحي.
- وعسى ما هي زيادة كبيرة.
* تتعدى 40%.
- وشو.
* تتعدى 40%.
- 40%!! الله يعينك.
* أقول.
- سم.
* ما تقدر تسلفني.
- ودي والله.. بس العين بصيرة واليد قصيرة، وانت ما شاء الله قدرت تجمع وتبدأ تبني، وأنا عساي أقدر أجمع إيجار البيت!
* والله مشكلة.
- طيب.. خذ قرض من البنك.
*ما يعطون.
- ليش؟
* قرضي إلى الحين ما سددته.
- الله يعينك.
* أبيك تساعدني في شي ثاني.
- آمر.
* دور لي واحد يشتري فلتي على الحال اللي هي عليه.
- هذي مقدور عليها.
والله المستعان