جاني خبر محزن وظليت اقاسيه
من حب عبدالله بجوفي مليله
مات الصديق اللي نعزه ونغليه
ابو سعود اللي قليل مثيله
عبدالله بن سيف بالحيل نبكيه
لا والله اللي مات شاعر قبيلة
عز الرفيق ومن عناله وناصيه
مهوب خبل مايجمل حصيله
يالله يا ربي من النار تنجيه
وتسكنه بجنانك اللي ظليلة
لو البكاء يفيد ببكيه وانعيه
لكن هذا الموت مافيه حيلة
دنياً على المسلم تزخرف وتنهيه
دنياً ترى ماهي بهلها طويله
مكرم الضيفان واللي يخاويه
مثل جمل زومان حمله يشيله
شاعر مع الشعار تعرف معانيه
مهوب مثبورٍ يجيب الفشيلة
وفيه الحميه دون ربعه وعانيه
ويفزع لمن ينصاه واللي يجي له
وقته مع الشعار دائم ايمضيه
ويسج مع ربعه وقلبه دليله
راعي الحساني عند ربه حسانيه
وعلوم غير اللي عمل ويش هيله
لا ضاق خاطر من عناله ايسليه
بهروجه اللي وافياتٍ جميله
وصلاة ربي عد مانشت مناشيه
على رسولٍ كلنا ننتميله
