الشعر يا أهل الشعر نزهه ومدهال
وكلاً يولف حسب ما يشتهي له
وأنا حكمت الشعر دله وفنجال
مثل العروق اللي تلم القبيله
الشعر حكمه ترتوي منه عقال
تروي ضماها من موارد مسيله
والشعر يبغى له من الناس جمال
يصحى لبني البيت حتى يشيله
الشعر له مبدا ومخرج ومدخال
حمله ثقيل وقل مَن يرتيكي له
يا نفس جودي بالمعاني والأمثال
معنى ثمين وقاف ما فيه ميله
نسرح مع الأفكار في كل منزال
نسمي ونصبح والقوافي طويله
نبحث عن اللي يشرح الصدر والبال
عذب القصايد ما ندور بديله
سر يا قلم في طواعنا وانت مرسال
مثل العميل اللي يوفي عميله
يا الله عسى شعري له اجيال واجيال
يورث مع الأيام كلاً يجيله
