في غيابك..آه لو تدري بحالي في غيابك
إلتهت فيني جروحي والعروق اضحت ضمايا
في غيابك لهفتي ما عاد يرويها سحابك
من رحلت اشقيت روحي وما بقى فيني بقايا
كل ما مرت عليْ ذكراك ما فارقت بابك
أدري إن الدار قفراء.. بس ذا صوت الزوايا
صار بابك يحتريني.. ذاق حتى هو عذابك
والمرايا لا دعتني تاه عذري للمرايا
الجرس والباب والسدرة وانا فدوى شبابك
كل ابونا من تركت الدار في حبك ضحايا
إن تناسيتك نسيت ودار فكري وابتدابك
وان تماديت بتناسيك سألت عنك الحنايا
يا مناي ابطيت عني ما يكفيني جوابك
يوم غبت الكل غاب.. وجيّتك كل الهدايا
وينك اشتقت لحديثك، همسك، سكوتك، عتابك
كل شيٍ فيك اشوفه عذب يا عذب السجايا
ما عرفت الحب قبلك لين زينت الحشابك
وانتشت روحي بحبٍ ما وطى درب الخطايا
إن بعدت الله يحفظك.. وان رجعت فيا هلابك
تسكن الروح بغلاك وتغمر ايامي مزايا
