سلام يا الله كلما جيت ما القاه
والى زهمنا قيل ما هوب موجود
تلقاه بالبرّان - يارب تاقاه -
أو في ديار كل سكانها سود
ما أدري وش اللي في مقانيصه اشقاه
يوم يجي صايد ويومين مصيود
ما شاف له من نايفٍ راح برقاه
بين الجبل والسهل كم ضاع مجهود
لو يبذل المجهود في شي يلقاه
في قادم الايام يعطيه مردود
كان استفاد وفاد شعبه وملقاه
وبنى لنفسه مجد للناس مشهود
مِنْ لا زَرَعْ زَرْع ومِنْ جهده اسقاه
يندم الى جا يوم حاصد ومحصود
يا متعبٍ نفسه ورا الصيد ما اشقاه
كم واحد جسمه غدا كنِّه العود
وكم واحد راسه بها حِط عرقاه
متلخبط فكره ولا عاد به فود
وكم واحد صعبٍ على النفس فرقاه
لقوه في قفر من الارض مرجود
وكم وحده من ناقع المُرّ مسقاه
وتقول من شيٍّ لجا بالحسا زود
يا شقّ جيبي بالاجاويد شقّاه
على عشيرٍ ذاله الحول مفقود
راح يتقنّص واعتبَى ماه بِسْقاه
بالبرّ تاه ومات ظميان ملهود
من سار في درب الخطر ما توقّاه
لا بد ما ياقع بنكبات ونكود
واللي يبي في سلّم المجد مرقاه
فالعلم والله للفتى خير مورود
وهو السلاح بذا الزمن للملاقاه
الامر واضح ما يبي حلف وشهود
الكمبيوتر أذهل العقل والقاه
في حيرة والعلم ما هوب محدود
يا سِبْق عصر العلم يا ناس سِبْقاه
في كل لحظة ينتج الفكر مولود
سبحان ربٍ أوجد الكون وابقاه
فيه العبر لناس الى البعث والعود
صلاة ربي دايم الدوم مِلقاه
على نبي شِرعته ما بها كود
