حاولت أبكتم عبرتي والتناهيت
وأقضي على الأحزان... وأقطع وريده
وأسلى مع السالين لا أصبحت وأمسيت
وأدخل رياض الفال.. وأقطف وروده
لكن خفق القلب نادى ولبيت
والشعر قام.. وسال دمع القصيده
وشلون ننسى هامة عالي الصيت
بره.. ومعروفه تجاوز حدوده
لا حل ذكره صار بالفكر تشتيت
وعيا العقل يعطين جمله مفيده
ولا مرّني طيف أبيض القلب حييت
ومديت له يمناي.. وأيده بعيده
حمد.. حمد.. صوّت.. رددت.. ناديت
ويرجع صدى صوتي يلطم خدوده
يالله ياللي عن نظرنا تواريت
في قول (كن) يحصل لك اللي تريده
نسألك بالفردوس تبني له البيت
وتحسن له المثوى.. وتكرم وفوده
وتشفي جنيني يارجيمٍ تعاليت
وتجعل حياته ياإلهي سعيده
وتمد في عمره على ما تمنيت
وتستر بنياتي بستر العقيدة
وتجبر عزا اللي رددوا عند هالميت
عز الله اللي راح منا فقيده
