توّك بقى في السوالف شي ما قلته
تو النواظر لشوفك رمشها هامي
الوقت كله معك يا صاحبي عشته
قمة طموحي اشوفك صرت قدامي
حمل الغلا والموده داخلي شلته
والعشق يسقي جذور عرقها نامي
ما عمر طيف الغرام بيوم ما زرته
اصبح خيالي يزورك كل ايامي
حاولت ارشف رضاك ومنك ما نلته
طبعك معي ترتشف من جرحي الدامي
وأحاول أصل مداك وما بعد طلته
كنه سراب تلامع في نظر ظامي
ابلحق الدرب في ممشاك لو ملته
وابختصر خطوتي في قفزة احلامي
واجيك احمل كلام ما بعد قلته
وانثره في حضنك اليا صرت قدامي
