لا باس يا شيخ المهمات لا باس
ولا باس يا رجل سمر عظمها نحاس
أتعبك شيخ فوق درب التعب داس
يا الله عسى ما فيه من هم واوناس
أقولها من قلب وشعور واحساس
اقولها وتقولها مثلي الناس
شيخ بنا في قمة المجد له ساس
نسل الشيوخ اللي لهم قوة وباس
يوم الشيوخ تشاف بظهور الافراس
تاريخهم محفوظ في وسط قرطاس
شيخ له الشيخة مواريث واساس
ابو ذعار لكامل الطيب نبراس
الحميدي اللي سمعته ترفع الراس
جمايله من كثرها ما لها قياس
له في سنام المجد والعز مجلاس
حكيم ومحنك وله فكر حساس
كم واحدٍ جاله بعد ما اعلن الياس
وكم واحد في حل مشكلته احتاس
وكم واحد صابه من الهم وسواس
وإلى وصل عنده نسى كل هوجاس
وانحل موضوعه وهو قبل منحاس
ليت للفعول الطيبة والوفا كاس
اللي كسب بفعوله اجر ونوماس
أبو ذعار إن صار للحبل مساس
يفداه منهو بالمجاليس هلاس
وإن جيته بحاجة تظاهر بالافلاس
يالله لا تكثر على الارض الانجاس
اللي لنار الحقد والحسد مقباس
وانك توفق واحدٍما له اجناس
أبو العلوم الطيبة طّيب الساس
شعري بمدحه يا هل العرف ما يقاس
وإلا الكلام الطيب أغلى من الماس
لا باس يا شيخ الوفا والمواقيف
من كثر روحاتك وكثر المناكيف
ما يحسب الاتعاب والا التكاليف
تصير له خيره ورحمه وتخفيف
من خاطر صافي ولا فيه تزييف
مشاعر ترفع لراع المعاريف
قدوة رجال عزمهم ما هو ضعيف
يوم الرجال تخوف الصعب تخويف
وسلاحهم بالشلف والرمح والسيف
له في سجل المجد والعز تعريف
ما هو من اللي شيخته بس توظيف
يمشون في رايه رجال عواريف
مواقفه بالفعل ما هي سواليف
يا قل من مثله عديم التواصيف
نجمه سطع في عاليات المشاريف
صعب الامور إلها بفكره تصاريف
من دون مطلوبه حدته الصواديف
وجا له بعد ضاقت عليه المحاريف
يجول في صدره سواة العواصيف
يد له ببيت مدله الجار والضيف
وحصل مطاليبه عقب ما هو معيف
ويعطى لابن بتلا بعيد المهاديف
وصنف من أهل الخير والطيب تصنيف
يفزع لمن يشكي عنا الهم والحيف
وان صارت الصملة توارى ولا شيف
ويحرف الاقوال والحكي تحريف
اللي هروج الزور صارت لهم كيف
إيولعون الشر توليعة الليف
يا الله تفكه من جميع التخاليف
مشهور في طيبه من السيف للسيف
يعجز قصيدي عن كثير التعاريف
والذ وأحلى من حليب المشاعيف
