يا حسين لا تبكي. وكن الذرايف
الجفن مثل الوجه ما يندفق ماه
أشوف يا عمك. مثل مانت شايف
مير احتسب. مثلي وقل حسبنا الله
كن البكا بين الضلوع النحايف
الصدر مثل القدر. والقدر بغطاه
لا تبحث الخافي. تراني مهايف
مير أتعنّز بالعزائم مداراه
أبوك مات وعقبه أبوك نايف
وقفة وفاء. ما هيب وقفة مكافاه
وأبو فهد (سلمان) بالكف رايف
مسح على راسك ومتنك بيمناه
ذولا سندنا فالسنين العجايف
والله ما أذكر غيرهم حي أنصاه
أبناء زعيم منه فيهم وصايف
من فاته (معزي) يجي ينظر أبناه
منا لهم يا حسين بيض الصحايف
علم يسد أدناه عن جملة أقصاه
ولو تنفع الحسره. وكثر الحسايف
قلت آه ثم ناديت ناس تقول آه
علي من ضيم الليالي كلايف
أخٍ وحيد وذقت أنا مر فرقاه
لا مر زول مثل زوله مسايف
أخذت ساعة بالعيون أتحلاه
يا من خبر من راح مثلي نصايف
فالقبر نصف. ونصف يبكي بدنياه
عشنا سوا. خلف الدلال النظايف
مجلاسنا واحد. ومركاي مركاه
دنيا العنا كم فرَّقت من ولايف
أحدٍ رحل. وأحدٍ يعيش المفاجاه
نرضا القدر. والله عليه الخلايف
عسى الفرج ياتي منه عقب بلواه
يا رب أنا لعظفك ورحمتك ضايف
اجبر افؤادي. واجعل الخلد مثواه
يا حسين فارقت الطرب والطرايف
من يوم ابوك أقفا وقفت مطاياه
أبوك رجل فالرياجيل كايف
ما يطرد المقفي. ويفرح بمن جاه
وثبت على الأقدام ما هوب خايف
يوم البنادق بالمخازن معباه
قدم على اللي ينقلون القذايف
ومن قدس الواجب. عرف ويش معناه
ومعه توفا من عيال العفايف
ستة نشاما كلهم مثل شرواه
دون الوطن ترضا المنايا وظايف
شرى الشهادة. منهم الرجل بادماه
واللي على المسلم يسوق الحتايف
متى على الله يلمس السيف علباه
ناس تبي تجعل وطنا طوايف
وحنا يدٍ. فيها الاصابع مساواه
شراذم غابت وجتنا نكايف
ياليت من جاب أجرب الجنب وداه
وليا رجع كل من أرياه عايف
وليا دليله. مثل كشرة ثناياه
الحكم. حكم أهل السيوف الرهايف
والا راع المعزا. يعود لمعزاه
حكامنا آل سعود غرٌ حصايف
ما مثلهم ساد الجزيرة بحسناه
ولا قلت لي قول وراء الحق زايف
على كلامي تشهد اشيوخ وارعاه
