هنيت يا منهو من العقل مسلوب
ما يجرحه لوم ولا يبدي عتاب
ولا تشغله دنيا ولا هجر محبوب
ولا يميّز بين ربعه والاغراب
ولا يهمنه مواعيد عرقوب
وان زاره احد ما وطى زلفة الباب
ولا من يقول فلان ما وفى بما جوب
ولا يقال اصبغ ترى عارضك شاب
ما هو سواتي جوفه وجار مشبوب
كني بالارطى داخل الروح شبّاب
لا قيل وش بك قلت تكفير لذنوب
الله علم وش بي وهو رب الأرباب
حياتي اللي روحت كنت منهوب
لوقدروها ماسوت حفنة تراب
لا واحسايف عمري ان كان محسوب
ولا حصل لي منه ياكود الانشاب
انا على امري دايم الدوم مغلوب
وش عاد ينفعني لو ابديت الاسباب
اعيش في صوب والافراح في صوب
قالوا تحمل قلت ماني بكذاب
(ما قدر المولى على العبد مكتوب)
وش حيلتي لا صرت مومن ومنصاب
