يا هاجسي عندي لك أخبار وعلوم
يا غاليٍ ينصى.. عزيز وغالي
سلم على قرمٍ تسيد له.. أقروم
أمير نجد اللي رفع.. نجد عالي
تحية فيها شذا ورد يا شموم
مثل الشهد صافي وطيب.. وحالي
سلمان زيزوم على كل زيزوم
حرٍ شهر من نايفات الطوالي
من مخلبه يرسل صواريخ وسهوم
على خصومه صاطي.. ما يبالي
وألين من الماهود لا جاه مضيوم
حلوٍ جنابه والعطايا جزالي
لا جاه من يشكي من ظروف وهموم
يروح من عنده من الهم سالي
وابن الزعيم معدل القوم بالقوم
عبدالعزيز اللي طلع بالحبالي
جاها وهي في حزنها تطيح وتقوم
العيطموس اللي تعيف الرجالي
يا كم خطبها قبله الفرس والروم
وعيت من الخطاب يا هملالي
وذعذع سعدها في يمينه عن اللوم
وتوحدت.. غرب.. وجنوب.. وشمالي..
وتزينت له وألبست غالي السوم
ودلل عروسٍ تستحق الدلالي
واليوم شوف (الفرق بين أمس واليوم)
نهضة وطفرة من عزوم العيالي
خمسين عاماً كلها فكر وعزوم
حطت عماير.. في محل الجبالي
سلمان خلى العاصمة كنها تحوم
فوق الشهب من عالي فوق عالي
يدعم مشاريع به تقوم وتدوم
الله يديمه كل ما جاء مجالي
وبابه مشرع والطوابير بالكوم
بالقصر.. والا في دوامه.. مثالي
يسهر ومثله ما يجي عينه النوم
عليه قالات عراض طوالي
وخصوم وخصومٍ تداعي على خصوم
ومعاملات ما لها.. أول وتالي
ويحلها سلمان لا قام معلوم
مثل الجمل لا حمل الحمل شالي
وبالبوسنة كم مد جائع ومحروم
من عفته يصعب عليه السؤالي
وحنا هل العارض.. حكومة ومحكوم
وأحب نجد ونجد.. عمي.. وخالي
