يعود العيد بأفراحه وأثر نجمي هو المفقود
بعد ما ازدانت الدنيا بعقد نجوم اشعلها
توكلنا على أملنا وعوّلنا على المعبود
تضرعنا اليه بنجمنا اللي غاب يكملها
وطموحي رغم بوحي ما تهزه عاتيات النود
ولكن لي على خلي أمورٍِ ما اقدر اغفلها
جهلت - وربي - القصة ولا أعلم وش المقصود
أنا اذكر أني عبدالله وهي حبي وقابلها
غمرني احساسها بأول غرامي والأمل معقود
وبادرت الغلا بعناقها وأصبحت جاهلها
سهام ما تصيب إلا حشا من حبها يا سعود
حسافة ما جنيت إلا عذابي يوم ادللها
أنا لو كنت اعرف اللي يقدر خاطرك مجحود
تنكرت لغلاك من البداية ما أجاملها
تبي مني الغلا والود ولا تشعرني بمردود
قناعة ودي افهم: وش مدىتفكير قايلها
ألا يا حبي الضايع مشاعر ما لهن حدود
تجاوز بالضمير آفاق واقعنا وحاملها
تعالي وانتي اللي لك علي الفضل رمز الجود
وإذا روحي لها شرهه فمن أجلك وسائلها
أخاطب فيك وجدانك أخاطب حسك المنشود
وتبقى للقيم والنفس وقفة ما اتجاهلها
