يا الله يا فارج عن العبد شده
تفرج لمن مثلي تلحف بالاحزان
موق العيون الدمع عيت تصده
دمع تحدر وانتثر فوق الاوجان
صارت عيوني للبكاء مستعده
لو جف ماها حدرت دم هتان
عواصف وسط الحشاء مستبده
تلعب بها لعب الهبايب بالاغصان
ابكي على من فارق اللي يوده
على النعش شالوه مسجي بالاكفان
كلٍ على ناصر كسا الحزن خده
انا وجيرانه وربعه والاخوان
كبدي عقب فرقاه زادي تلده
كنه يولع داخل القلب ضيان
والحيل عقبه كل شي يهده
طرفي يخايل كوكب الصبح سهران
عفت الفراش وعفت نوم المخده
يسري بي الهاجوس في كل الاحيان
عساه بالفردوس ياصل لحده
ويسكن مع الابرار جنات عدنان
