آه من قلب تعنا ما تحقق له طموحه
وآه من نفس تتوق لكل علم ما تهيا
راح عمره يدمل اللي ما تعافا من جروحه
والنتيجة جرح طاب وجرح يا فرحان عيا
وش بقالي من زمان تنتظر منه السموحه
راح با اجمل ذكرياتي وانطفا بالعمر ضيا
لا جزاه الله بخير كل ما شعشع بضوحه
في حشا المجروح ناره تكوي الخفاق كيا
وسمها وسط المحاني الجمت قلبي وبوحه
آه يا بعد المسافة بين فرحي والثريا
كيف أداوي علة اللي ذابح روحه بروحه
كن ما عنده لنفسه لا شعور ولا حميا
القطار اللي تعدا ما يرده كثر نوحه
الأمل يقول لحظاته والزمان يقول هيا
