ياعبيد ياصقر على كف داعيه
ياعبيد خذ مني وصاة عظيمه
الاوله ياعبيد فرضك تصليه
هذي على الاسلام فرض قديمه
لو ان عمرك طال فالموت قافيه
عن هادم اللذات مامن هزيمه
عملك يكتب بالموازين تحصيه
تشوف ماقدمت عدل وظليمه
الثانيه شي تسرك معانيه
فعل الكرم واقطع حبال النميمه
بيت بليا ساس ماينزل فيه
سريع ماتنظر بعينك هديمه
الثالثه شر العرب لاتجي فيه
اجهد لهم بالنصح واطف الجريمه
راع الطلب يلحق على الطول راعيه
ادخل عنه والا تزوره بشيمه
واللي يعرف الحق ياعبيد يكفيه
ومن لايعرف الحق مثل البهيمه
ومن لايرد الشور لك لا تراعيه
خله بدربه مايفيد تعليمه
عليك حق لازم ماتخليه
تصون عرضك والسلامة غنيمه
هذي وصاة الوالد ابنه يوصيه
والعمر فاني والليالي مقيمه
