ذبحتنا هالاهداءات الماصلة اللي صارت تنافس شريط الاخبار في هالقنوات وتخلينا نحمد ربنا على العقل، ومن زين الطبايع كلها متشابهة ماغير وحشتوني وبحبك.. ومن هالمنطلق حبيت اسوي لي كومة اهداءات عشان اكسر سوقهم نشوف الاهداءات مع بعض.
** الى الغالي دحومي ترانا تحت الكبري ضابطين لنا بريق شاهي لايفوتك.
مع تحيات راعي السدرك
** من ام عبدالله الى ولدها في الخيمة انتبه عن البرد والبس اثقل ماعندك ولا تغسل مواعينهم اكرشهم بس.
ام عبدالله
** اهدي مقطع من مسلسل قريندايزر لعريف الفصل واقول له لك يوم يا ظالم.
تحياتي الدافور
** الى ولد جيراننا واقول له رجع شريط السوني اللي خذته لايجي علمن اخر.
مع تحيات ابو شطحه
** من عبدالله الى ناصر بمناسبة تسديد كومة القسايم ولا تعودها هماه.
** الى خلودي ترى جوز الحمام اللي شريته مني رجع للعشه تعال خذه تحيات اللي باعك قبل اسبوع.
** باقة ورد الى صلوحي واذكره ان العشاء عليه الاسبوع الجاي ويمدحون الفول وعلى فكره ترى الاسطوانه فاضيه.
** اهدي كيسة اندومي الى شغالتنا في اندونيسيا واقول لها ما عاد للكبسه طعم.
تحيات دودو
** الى سمسم انتبه لنفسك ترى عيال الحاره ناوين يعفجونك لاتحرص على الطلعه لين تهدأ الامور.
محبك راعي الددسن
** مطلوب كل من يضبط الذبح والصلخ ولفّ المصير الاتصال علي افزعوا تكفون ماعندي احد يذبح
تحياتي ابو كرشه منفشه
** الى العريجي ابو قذله متى تكون فاضي ودي نسحب سست الهايلكس تخبر العيد قرب.
مغليك ابو فلقه
** اهدي مشط حجم عائلي لبو «كشه» واقول له حومت تسبودنا انت وهالعوشزه اللي فوق رأسك متى تحلقها.
تحيات م.ن
** الى عامل مزرعتنا تراني منيب قادر اجيب لك خبز بكره مشغول حيل ياليت تدبر عمرك.
** الى امي في بيتنا تراني منيب جاي للعشاء بروح اناظر السيول لاتحتروني.
** الى الطارة في باريس واقول له وش علوم الجلنطات في الشانزليزيه وترى مافقدك الا انا ونخل الحاره بس.
** اهدي حافظة عصيد لجدتي في نيوزيلندا واقوللها ادهني ركيباتس بزبدتهم وتراتس وحشيتنا موت..
| 
