يمكن يضيع الشوق في داخل إنسان
ويمكن يضيع إنسان من كثرة الشوق
الشوق لوعة.. وانتظار.. وحرمان
وآهات ليل.. ودمع.. وإحساس مخنوق
تلعب به الدنيا على.. كيف الأحزان
والنوم بعيونه.. من الهم مسروق
وكم خافق من حرقة الشوق ظميان
ما كن له حس ونبضات. وعروق
ما عاد له في عالم الحب سلوان
وما ظنتي من عقب محبوبة ايروق
وكم من عيون.. بالهوى شانها شان
يسوقها ليل السهر والألم.. سوق
تسابقت عبراتها.. فوق الأوجان
دمع حداه الحزن من محجر الموق
الناس تتعبها العواطف والأشجان
وما كل عاشق بالهوى صار معشوق
أحد شكى همه على فلان وفلان
وأحد يعاني ما درى فيه مخلوق
يا صاحبي كانك على الوصل شفقان
فاعرف ترى قدرك على الراس من فوق
اشتاق لك شوق الهبايب للأغصان
واحن لك.. حنة.. خلوج من النوق
جيتك وقلبي للشقاء صار ميدان
وثوب الصبر من خطوة الياس مشقوق
هذي حياة الناس رابح وخسران
ولا غاب برق.. بالسماء لاحت ايروق
