صد وتغلى لاجزى الله من على ولفه يجور
أنا أشهد أنه بالهوى فَلّ الخفوق وجمعه
حالي تلف بي من كَثَرْ ما هو يلف وما يدور
لا هو جزعني بالغرام ولاني اللي بجزعه
ان جيته ادبر وامتحني من نفور اليا نفور
وان غبت ينشد غيبتي مرّه... ثلاث... وأربعه
وان قلت احبه والله أن كاتمٍ بين السطور
فوق الغرام اللي فضحت اسرار كون مْجمعه
مير البلى خوفي عليه ان زدت ينتابه غرور
والقلب من ضيق الدلال احتاس وشلون السعه
مجبور احبه وارتضي وارضى على كل الأمور
لو يطلب اشلعله خفوقي والله اني لشلعه
كن الهوى من قبل اعرفه قاحلٍ والعشق بور
لين ارتوى قلبي هواه ومشربه من مدمعه
اصغر تفاصيله جبينٍ يحجب البدْر الظهور
واكبر تفاصيله جبرني بالغرام اقفي معه
انا اشهد أنه طاغيٍ في كلُ شيْ بدْر البدور
في طلته... في وجنته... في رمش وابهام اصبعه
شفت الحضور بْطلته ما عادوا قْبالي حضور
والزين لو ما زعزعه شيٍّ حبيبي زعزعه
كامل كمّل والله اللي كمّله ما به قصور
غير التغلي والغلا والباقي الله ما اروعه
صد وتغلى ما يرجى الله ولفي الليله يجور
واسهر على جور الغلا ليل الغرام ومطلعه
