الحظيط اللي ليا منه رحل واقفت ركابه
لاهو ابيض سجل مايطلب ولا مثقال ذره
ما ظلم مسلم ودرب الشر ماعمره مشى به
واجه المولى قبل يخر على غيره مضره
نادر ومن زود منفوعه ومن زود الذرابه
او نسوا بكبودهم ربعه بعد فرقاه حره
عاش في الدنيا غريب ومحكم القول اعتنى به
مغريات الدار الاولى الفاتنه عجزت تجره
القناعه كنز واكبر كنز في الدنيا حظى به
قوة ايمانه بمكتوب القدر خيره وشره
مثل هذا ينغبط ماينغبط مفني شبابه
في الدروب اللي بعد بكره تضره ماتسره
لا وجد ما قدمت يمناه مرصود بكتابه
وشاف الاهوال ودرى ان النار ملفاه ومقره
مير ياللي غافل اسمع كان تملك للبابه
بادر بتوبه واخذ كره على نفسك وفره
شد حيلك في جهاد النفس حاربها حرابه
والرجيم ابليس في عينيه ذر الكحل ذره
اتبع سنة نبيك وانتهج نهج الصحابه
كل يوم ارض الولي واستغفره سبعين مره
لا تهاون بالصغيره كل شيء احسب حسابه
انتبه والنار طبتها مره باسباب هره
واذكر ان العمر مهما طال تقفاه انحطابه
واعرف ان الموت حاصل والنوازل مستمره
