يا بو محمد ذي صروف الليالي
تضحك وعقب أيام يظهر نكدها
ولا ذكر رجالٍ من الهم خالي
ولا ضاقت الا عند ربك مددها
محمد على عمه عزيز وغالي
مير العزا في بذرةٍ ما حصدها
لين وليان اليوم حسبة عيالي
الله يقدرني وأحاول سعدها
كم من ضعيف ساعده بالحلالي
وكم من عجوز في حياته نجدها
يلقاه عند اللي على العرش عالي
عسى جزاه بجنةٍ قد وردها
وللعايله يا شيخ كلك ظلالي
بك تعتزي.. ياعزها يا سندها
وحنا ترانا بخير بأول وتالي
لولا شياطينٍ شقاها قردها
اللي غدا لا بليس عبدٍ موالي
ترهب عباد الله وتدمر بلدها
والا الشريعه ما عليها احتيالي
ما تلحق النفس البرية قودها
انصع من الثلج البياض الزلالي
وأرحم من الام الرحوم بولدها
وأيماننا باخوان نوره طوالي
وشريعة الرحمن حنا عمدها
باخوان نوره واردين المعالي
والدين.. والعزة ربح من قصدها
يا الله يارحمن.. ياذا الجلالي
انك تحرس الدار ممن حسدها
