نجم من عنيزه هوى وانطفا نور
وطاحت معاه نجوم الإبداع تبكيه
يا نجم موتك حطم قلوب وصدور
فيها من الابداع ما كنت تمليه
يبكيك حرف جمّل ابيات وسطور
ويبكيك ديوان العرب يا محلّيه
منك الشعر.. ياما نداوي به شعور
واليوم جرحك كيف نقدر نداويه
جمهور يبكي لك.. ويبكيك جمهور
غالي.. ومن ينسى احاسيس غاليه
نودعك عساك في جنة الحور
عقب المرض ذنبك عسى الله يحميه
آمين.. ياللي بطاري الطيب مذكور
واللي ذكر بالطيب طابت مساعيه
بنيت «بيت الحب» بقلوب معمور
يعيش ذاك البيت لو مات بانيه
لك بصمتك في مرحلة طورها طور
والشعر يشهد بأن لك نقلة فيه
يبقى معانا اسمك مدى سنين وشهور
يخلدك فنك بأسمى معانيه
وما مات من شعره مع الناس مشهور
مدام شعرك حي.. وشلون نرثيه
ولو قال جمهورك يودعك مقهور:
يا كتلة الإحساس خليتنا ليه
وقال الشعر مانساك.. لو قلت مجبور:
«ذكرتني حبك وانا اقول ناسيه»
