في حضورك في غيابك ما يغيّر لي مزاجي
في كلامك في ملامك ما تكدّر لي طربها
لا تحسب ان كل قلبٍ انعكاسه كالزجاجي
وان ياخذ كل عينٍ حسنك ويعلن نهبها
كيف اعذرك عقب هجرك وانت برجك برج عاجي
شفت نفسك مثل شمسٍ للنهار الله وهبها
من عطى لك حق تجرح من يقول انّك علاجي
لا تسولف عن علاجي والجروح انته سببها
لا تناجي في عتابك العتب غير التناجي
خذ مقامك باحترامك لا تبيّن لي عتبها
طال داجي كيف اناجي في الهوى شخص احتجاجي
صار قدره مثل عذره يشبه ذنوب ارتكبها
لا تلاعب بالمشاعر دام بحر الشوق هاجي
المشاعر نبض شاعر والحظيظ اللي كتبها
وانت ياللي صرت خلّي احذر اقوال المداجي
قال كلمة لوم لكن ما عرف كيف يحسبها
وان صفينا والتقينا لا تكدّر لي مزاجي
خذ مقامك باحترامك لا تبيّن لي عتبها
