مياسه القد يامحلا تفليها
وش عاد لوهي تواصلني وتجفاني
احترت فيها صحيح احترت أنا فيها
شوفو نتيجة غلاها وين وداني
أحب فيها الذكاء والصّمت وأغليها
شموخها بعثر الأول مع الثاني
من صادق الحب أنا انهل حب واعطيها
لو ذقت منها العذاب أشكال وألواني
داخل عيوني عن العالم مخفّيها
ما تبعد بعيد من قلبي على أعياني
أصبح والطيف ينعشني بطاريها
طيف الغلا وين ما وجهت خاواني
تعتب وأنا أعتب وأزعلّها وأراضيها
وأهدي لها الحب من قلبي ووجداني
أكتب لها الشعر ايه الشعر واهديها
تحلالها يابدر عذبات الألحاني
