|
قاسيت المعاني بافتكار
والى ان الامور مشقلباتي
والى متاعها ايام قليله
والى بالحمايل ما يلاتي
واحسن ما لنا تبع الرسول
مع رسومه لنا ومبيناتي
واكرام غريب جا بدارك
ترى في الجار خير الملزماتي
جارك اسمعه غالي نباك
وتجنب للامور الفاحشاتي
وارخص دون جارك كل غالي
وافزع له بحد المرهفاتي
وجاراتك تقل عنها كفيف
في سلم العرب مثل الخواتي
لابد الجوار من الفراق
فرقا تودع الممشى شتاتي
وانا احذرك من مال اليتيم
ترى انه هو اشد المحرماتي
والغيبه بعرض المؤمنين
تهوي بصاحبها للهاوياتي
واصل الدين اوصيكم عليه
باب الدين خير الفايداتي
اولها شهادة مخلصين
بتقوى الله وخل المعضلاتي
وثاني فرضنا وقت الصلاه
نسجد والسراير خاشعاتي
وصيام رمضان احسن فريضه
نصبر والشفايا يابساتي
ليلة عيدنا والشهر وافي
دفعنا فطرنا للصايماتي
ولله عندنا حج بيان
حسب المال واداي الزكاتي
حق الله ما يغني فقير
ولا يقصر غني عن غناتي
حج البيت لمن طاع السبيل
فوق الهجن والا الساعياتي
|
هذال بن فهيد الشيباني
| 
