مدري علامي عجزت اصد وانساها
حاولت لكن عجزت انسى وصايفها
تزعل عليه واحاول دايم رضاها
اخالف الناس لكن صعب اخالفها
من دون وعيي كذا مجنون وياها
تصد عني وانا قلبي موالفها
احاول انسى ولكن طيف ذكراها
لاجيت ابي انسى يذكرني مواقفها
يسرح خيالي بدون شعور والقاها
واغيب عن واقعي واسمع سوالفها
اسقي بخيالي مشاعر ظاميه ماها
اروي ظماها واجدد عهد سالفها
واضحك لصوره خيالي عاد واحياها
احس فيها تلاطفني والاطفها
وامسك يدين تضم الروح برضاها
رغم الجفا هاليدين البيض عارفها
عيت تفارق عيوني رغم فرقاها
من كثر شوقي كأني تو شايفها
ياليتني قادر للهجر واجفاها
لكن بلايه عجزت انسى وصايفها
