سنمت يا أمير تذكرت فيحان
زرته لو ان الوقت ما هوب كافي
جدولك من فعل المواجيب مليان
ولا أشغلك وقتك عن تقص الخوافي
تجبر اظروفك لو تعليت من شان
تسعد انفوس يمها جيت لافي
يسعدك شوف الناس في كل ميدان
وشوفك إليا من جيت للناس شافي
سلمان فيه اخصال من نهج الأركان
ولا فيه عن عبدالعزيز اختلافي
راع الوفا منه الوفاء يكس الابدان
وافي وفيه الطيب للناس وافي
الله خلق فيه المكارم والإحسان
ضافي ومنه الخير والوصل ضافي
سبحان من حط المكارم بسلمان
خصه بميزات بفعله تشافي
أفعال ما يطلب جزاها من إنسان
فيه الكرم والجود لله صافي
حلم وتواضع وإن قسا الوقت مالان
طودٍ أشم وفيه ظل ولحافي
يللي عليك من أصعب الوقت نقصان
ولا حقك من سود الليالي خلافي
سند على سلمان لا صرت بحلان
تصير كنك في وسيع الفيافي
غيث الضعيف اللي من الوقت هزلان
يرجع لو إن اسنين وقته عجافي
يا رب تثقل له من العدل ميزان
في عيشته ترضيه وقت الكلافي
