واشيب رأسي من قبل حلة الشيب
قامت تلوحه كايدات النكايد
روعته الدنيا بهم وترهيب
وازرى يوقف للامور الشدايد
اخطي من اللي صوب القلب واصيب
وأنوح نوح الورق فوق الجرايد
وابكي وانادي في علو المراقيب
والقلب كنه فوق حمر الوقايد
بوقت العياد وعيدنا شقة الجيب
يا للي تعايد خل عنك المعايد
شفت الكرم والعز والجاه والطيب
يبكون شيخاً عنهم اليوم نايد
قلت الخبر بدوه لي يالمعازيب
قالوا رحل عنا سرور ابن عايد
طيبة جنا به ما بها شكٍ وريب
في ذمتي ما قد وطته النقايد
من شبته ما راود العار والعيب
روم المعالي دايماً له عوايد
كفه تمد اللي خذت من مكاسيب
من جاه فاله طيبات الموايد
في مجلسه يندار بالبن والطيب
ومن هرجته يقطف جديد الفرايد
خلف حراراً يقصمون المصاعيب
ساروا على اثره من قديم وجدايد
روح وخلابي جروح معاطيب
أبطى وأنا موجوع منها وبايد
اواه ليت أيامه أبطت وأنا أغيب
ويبقى سليل العز للعز قايد
يا لله يالمعبود يا عالم الغيب
خل احسناته كل يوم تزايد
ويوم الحساب ومحشر العالم مهيب
يا لله خله عن جهنم يحايد
ومع النبي المصطفى خله صحيب
وحنا معه لا صاد للموت صايد
