عقب المطر طاح والمرباع جاء حله
يازين لقط الزبيدي والحيا بادي
في ديرةٍ تطرب المشتاق وتفله
أيام نبت الفياض وزمة الوادي
من يم غربي نفي لعبيد والقله
دارٍ غلاها يتل القلب من غادي
سج القدم في فضاها يبري العله
يوم ان تالي حياة العمر الأنفادي
منوه وديع الركاب وطيب المله
عودٍ عن السلم والعادات ما حادي
يرعابها ذوده اللي دقه وجله
ما طب سوق المزاد وحدة الحادي
كله معرب عموق ومجهمٍ كله
يطرب له اللي يعرف عموق الأجوادي
والعود سلم الشيم والطيب طبعٍ له
من خلقته ما مشى بدروب الانقادي
من طيب رأسه يعقد الرأي ويحله
ترثه رجال اللزوم اليا حدا الحادي
والهيل والبن والفنجال والدله
والنار والليل هادي والفضا هادي
في فيضةٍ دوبها قبل أمس معتله
من نو وسمٍ يروي كل ورادي
يأنس لها البال ويغني على دله
يوم الولع للخفوق أفراح واعيادي
