يا مرحبا با الي له القلب مطواع
الهاجس الي ضاع من بين يدي
هاجس لغير السحب والود ما طاع
وخلى جميع الناس تشتد ضدي
يا هاجس الطيبة ترى القلب ملتاع
بأسبابك دموعي جرت فوق خدي
شفتك تناديني وأنا منك مرتاع
خايف إذا طعتك تجاوزت حدي
شربت منك الهم با المد والصاع
وأعلنتها قصة عذاب وتحدي
غصبتني لين أقرب الناس لي باع
وعليه صحت ونحت وأبديت وجدي
تغيرت فيني مسارات وأوضاع
كل الألم والهم تلقاه عندي
ما عاد ينفع فيك ترديد ما شاع
يوم كانت الطيبة مع الناس تجدي
حاولت أبين لك معاناة ما ضاع
ماني بقدك وأنت منت بقدي
واليوم أبرحل عنك والقلب ملتاع
ما هو على كيفي ولا هو بودي
