هلا يا مرحبا حييت يا الوافي عظيم الصيت
هلا يا للي تعاتبني قبل ردك ومرساله
أنا قصرت يا عمي واعرف اني معك ما قديت
ولكن البحر هايج ووجهي يضرب فجاله
ما بين اللي رحل عنا وبين الجامعة والبيت
ومثلك خابر هذا الزمان وعارف أحواله
يا أبو خالد أنا منساك لوني غبت والا أبطيت
ترا قدرك فقلبي من عرفت العلم يبنى له
ترى حزني بعدما قلت جاب النار للكبريت
وولع قلبي المكلوم وزاد الحزن مكياله
تصدق لاذكرت أبوي في عز الكرى فزيت
أنا ذقت الحزن والظيم بانواعه وبشكاله
بديتا بالحميدي ثم ليتك عنه ما قفيت
وخليته يحط البيت جنب البيت في باله
ترى لوني صغير السن وعن درب الونس عديت
بعد تسعة عشر عام عرفت العز ورجاله
يا زين معاتبك تكفى وإلى اخطيت قل اخطيت
تراك أبو ولي أخو وصبرك يا وسع باله
صديق أبوي.. لك حق ولو أني أنا ماجيت
صديق أبوي بأوفي له الين انحط في رماله
يا ليت اليوم هو العيد يا ليته وليت وليت
لجي عاني على بيتك واحب الراس وعقاله
الا يا أبو حمد قل له تراي أدري ولو ما وحيت
أنا له خالد وبندر وأنا بالحق الجاله
