نفاع كلمته وزود همومي
وأنا قبل نفاع داله وسالي
قلت العلوم وقال حامض علومي
معيض قفن فيه سود الليالي
يا لله يا اللي لك صلاتي وصومي
يا واحداً فوق السموات عالي
يا كاسي وجه السماء بالغيومي
يا ربي يا معطي العطايا الجزالي
يا دايم ما غيرك أحد يدومي
تجبر عزانا يا عزيز الجلالي
باللي مواقيفه تضد الخصومي
وهيفا السمين مربح أهل الحلالي
الشاعر العاقل عزيز السلومي
ضد الضديد وبالمجالس هلالي
لا قام بالماقف يسد اللزومي
ودايم علومه في صدور الرجالي
معيض قسمه من خيار القسومي
وعند الرجال أهل المواجيب غالي
ولا حصل بالسوق بيع وسومي
ينقد كلامه مثل نقد الريالي
الشاعر اللي ما يروح مهزومي
هذاك أبو بندر على كل حالي
ويا الله يا الرب الغفور الرحومي
تكرم من الجنة كريم السبالي
وصلاة ربي عد مبدأ النجومي
وعد الليالي وعد مبدأ الهلالي
على الرسول المصطفى كل يومي
اللي دعانا للهدى والعدالي
