إذا ما شلت همي من يشيله
وإذا ما شلت همك وش تبي بي
يصير الحب كذبة أو وسيلة
توصل للمصالح يا حبيبي
وإذا اللي حب ما حس بخليله
هوت شمس المحبة في المغيبي
اماني العاشقين المستحيلة
مع الذكرى يفسرها النحيبي
يمر العمر كنه حلم ليلة
ويا كثر الظنون اللي تخيبي
حبيبي روعة الدنيا الجميلة
حياتي ورد أيامي وطيبي
كفاني تلمس العين البخيلة
إذا صدت حيا بعض الذي بي
حظيت بحبك اللي ما مثيله
وصرت بدون جهدي من نصيبي
ويوم اني وفيت بكل حيلة
يقول الجاهل إن وفاي عيبي
حكى عن نفسه وطبعه وميله
وذا حال الضعيف المستريبي
أبا أوفى دام لي قلب انتمي له
وبصدق لين عمري ينتهي بي
علي مبداي لو بامسي قتيله
ربيت بصغري لعزة مشيبي
