علامك يا الحميدي يالوفى.. يا صاحبي قفيت
عقب ما مات عبدالله تركت العود في حاله
انا ما احسبك تنساني ولو عن حينا شديت
اعرف الذيب لو يقفى يرد الراس لعياله
وانا ادري ماتناسيته ولا عن صاحبك سجيت
ولكن الظروف العوج ما تترك حد داله
تفرقوا الحبايب.. وانتحوا عني وانا ظليت
احن لما مضى واشره.. حنين العاشق الواله
انا حزني على خالد معي من حيث ما حليت
تمر ايام والا سنين خالد حزنة لحاله
على خالد وعبدالله وبندر بالخفا ونيت
ونين الشايب المفجوع بعياله وراماله
على هاك الثلاثه نزف دمع العين مثل الزيت
اكفه بس يفضحني نزيف الدمع باهماله
فقدت الصاحب الوافي.. رفيع المنزله والصيت
لعله في الجنان الخضر مدهاله.. ومنزاله
ابا ادعي له ولعيالي الى صليت.. وان حجيت
وجميع المسلمين يعمهم مولاي بافضاله
مدام اني على الدنيا بضحي له الى ضحيت
معي بضحيتي وصيت عبدالله يضحى له
والى منك لقيته «عابد الرحمن» قل صديت
علامك ما تعايد شايبك لو عبر جواله
يكفى منه يا عمي صباح الخير كيف امسيت
لعله لي يجي مثله.. وطيب الرجل من خاله
