لمحت في خد الفواصل تجاعيد
جاها من الضيقات شي يكفي
حتى «بياض الفاصلة» جاه تشريد
يصيح: وينك يا طلالي وشفي
من لي عقب فرقاك يرسم تناهيد
انت الوحيد اللي كنت لي بكفي
خبر وفاته هز قلبي بذا العيد
من قوته ريق الحزن منه جفي
قالوا توفى لحظة القنص والصيد
رماه نذل في الجبال متخفي
ادري الرصاص يخيب حتى بتركيد
لكن رصاص الموت لا جا يوفي
ضاق الخفوق وكن في يديني القيد
صار الحزن واقف على اطراف صفي
تشهد له دروب مشاها على البيد
ومجالس فيها سلوم وتحفي
طلال غير الناس من دون تحديد
كل الوصوف الطيبه ماتوفي
طلال لا من طل والايد بالايد
تحس حتى البشت منه متدفي
طلال لا من طل نقطف عناقيد
ذيك الايادي بالكرم ما تعفي
طلال ما نبغى عقب غيبتك عيد
يا عل روحك بالجنان ويكفي
