عمّ حزنٍ عظيم رجال كل القبايل
وفرحة العيد ماتت مع طلال الرشيد
وحلّ خَطْبٍ جلل برجال وجبال حايل
والسناعيس شمّر من قريب وبعيد
أحسن الله عزاهم في عريب السلايل
من كسب كل طيب وكل فعلٍ حميد
مِرَّث الجود كساب الثنا والجمايل
والنواميس والطولات عوق الضديد
ونسأل اللي اليا من سيل ما ردَّ سايل
ونطلب الواحد المعبود رب العبيد
جعله لجنة الفردوس ذرب الفعايل
بين ظلٍ ظليل وبين طلحٍ نضيد
وأحسن الله عزا كل العرب والحمايل
وزوج وأم ورحم واخوان وابنا الفقيد
والوزن والقوافي والوفا والنفايل
واخوياه و«فواصل» وأمسيات القصيد
والقلم والورق وطيور واف الخصايل
والكرم والشجاعة والمقال السديد
وانت وانتم وانا ورجال كل القبايل
أحسن الله عزانا في طلال الرشيد
