جيت الرياض ولفه احزان وغيوم
والدمع جيته من محاجره ذايب
جيت الحزن منصوب واطنابه هموم
وبرفته شفت الأسى والغلايب
وجيت العيون من الحزن صحّت النوم
وجيت الحزن صحا نعاس الهدايب
والعطف جيته عابس الوجه مهموم
لمحت في وجهه هموم وعجايب
وجيت الوفا تايه عن الدرب منجوم
يسأل عن اللي تحتضنه الترايب
وجيت الكرم بابه مسكر وملجوم
ومبناه تلعبه رياح الهبايب
وجيت العطا مبوض كفه ومضموم
عقب البذل والجود عقب الوهايب
وجيت الونس وجهه من الحزن ماسوم
وسألته بربه وشنهي مصايب
جاوبني بصوت ٍ مكسر ومثلوم
وناظرني بعين ٍ بها الدمع رايب
قال العزا باللي على الخير مفطوم
وجه الوفا اللي تحتضنه النصايب
عزيز قوم اليوم ينعونه القوم
ولاجله عيون القوم تهطل سحايب
طلال ابو نواف ودعني اليوم
وضاقت بي افجوج ٍ وساع ٍ رحايب
حسيت في صدر العزا رمح مسموم
وحسيت في صدري توقد لهايب
قلت البقا لله والعمر مقسوم
ماغاب لو زوله عن العين غايب
لو كان مثل حيل ياشيخ معدوم
يامن رقيت بطيبك أعلا الرقايب
مرحوم ياحسن الخلق قمة الشوم
تشوم بك نفسك ياعرب النسايب
مرحوم ياللي بالفخر تعشق الحوم
تعشق دروب الطيب واهل الوجايب
مرحوم ياشيخ المواجيب مرحوم
يامن بفزعاتك تغيض النوايب
ياما بهجت لصدر بائس ومحروم
وياما دعمت اعلاج طفل ٍ وشايب
وياما نصرت بفزعتك حق مظلوم
بالحق غضت اهل الجشع والنهايب
وياما عطيت بسر ماهوب معلوم
شخص ٍ نصاك وراح راضي وطايب
وياما بنيت افكار وآمال وحلوم
شخص نظرها في عيونه صعايب
يالله عسى وجهك عن النار معصوم
بجنان خلدٍ مطمئن غير هايب
وبالله يامعبود يافارض الصوم
ياواحد لبيته تشد الركايب
ياسايق ٍ مزنه على كل مزموم
وسقت الرطب مابين عسب وكرايب
يالله ياللي تكسي العظم بلحوم
تكسيه بالسندس وتقبله تايب
الحمدلله والبقا له على الدوم
الله يلهمنا الصبر بالنوايب
للخلد ابو نواف للخلد مرحوم
وماجور يانواف بأغلى الحبايب
