آه من قلبٍ تزايد طعونه والجراح
كل يومٍ له طعون وفي الواقع جريح
والسبايب واحدٍ غاب عن عيني وراح
شدّ واقفى عن دياره وأنا عقبه طريح
وان سألتوني عنه قلت هو سيد الملاح
الحلايا فيه تكمل وهو طبعه مليح
نور وجهه يوم يقبل كما نور الصباح
والحياء والذوق والصدق من طبعه صريح
والحقيقه ذاك مثلي بعد فرقاي صاح
مير يا مشكاي ما فاد صوته لو يصيح
أتذكر كلمةٍ قالها لي في المراح
كلمةٍ دلّت على صاحب العقل الصحيح
كلمة خلَّتني أعيش يومي بارتياح
وأتمنى يرجع العمر لو ما هو شحيح
قال ما تصلح حياةٍ بلا جدّ ومزاح
ولا يعيش الحب في قلب مخلوق فضيح
اختبرته في البداية وبادر بالنجاح
واختبرني في النهاية وصرت أنهض وأطيح
مثلي الطائر إذا صار مكسور الجناح
مره أمشي في صعوبة ومرات أستريح
