لا تقتلين الحلم باول شبابه
ولا تدفنين الشوق بارض الوداعي
كثر الغلا رب المخاليق جابه
وانتي الغلا يا ام العيون الوساعي
يا دنيتي وان كشر الوقت نابه
والخوف شفته قام يلوي ذراعي
باقف على وصلك الى حد بابه
بس الهجر تكفين ما فيه داعي
لو طال عمري بنسى انك عذابه
واشتاق واسهر لآخر الليل واعي
يا ليت حظي مع حظوظك تشابه
وليت المقدر يجمع الشمل ساعي
ان عاش حبي قلت خلي انتخى به
وان مات فيني جيتك اليوم ناعي
اقري الزمن تلقين باول كتابه
حلم كتبه الشوق يرفض وداعي
