العيد عاد وعاد عيد المحبين
وكلٍ نهار العيد يلبس جديده
صلو صباح العيد للرب داعين
كلِ يحسب ما مضى من رصيده
وعقب الصلاه استانسو بالدياوين
كلِ يعايد من يباه ويريده
بعض العوايل بينهم دوم صافين
كلٍ يقول اليوم فرصه سعيده
متآلفين قلوب للرب خاشين
كلٍ تحلى بالصفات الحميده
العيد يبهجهم وبالعيد فرحين
كلٍ فرح في عيد من عاد عيده
وبعض العوايل ما تصافوا من سنين
افعال بعض الناس صارت شهيده
لا عيد يجمعهم ولا هم حريصين
كثير من يشكي مضرة حفيده
الى متى يا ناس وانتم مصدين
ارحامكم صارت عليكم زهيده
اصلاح ذات البين يحتاج تبيين
اسعوا بها يا اهل العقول السديده
واجمل تحياتي بورد ورياحين
عبر «الجزيرة» نكتبه بالجريده
وصلاة ربي عد نبت البساتين
على النبي اللي وقف في صعيده
