يابن فوزان تنشدني قصايدكم وش أخرها
مغير اللى على خبرك فديتك يابن الأجوادي
طرالي ما طرالي يوم تندبي وساهرها
بيوتٍ هيّضت نفسي من اسبابك وهي جدادي
بدعت أبياتها لجلك ومن شانك نصخرها
ألا يا دحيم لو تطلب أنا ممنون سدادي
ولو تبغي من أبيات الهدد والصيد اعبرها
على المقناص محلاها تجي حلوه وتنقادي
ترى حب الهدد يا دحيم روحي صار ساحرها
أنا مولع بنقل الطير وذبح الخرب بمرادي
شريت النادر الغالي ولا احسب خسايرها
لجل طربات في بالي فلا فكرت بالغادي
ألا يا عزة اللي حرم نفسه وحاشرها
جمع محصوله الحاصل بسردادي ومردادي
حلاة العمر خلاها ولا فكر يسايرها
شحيح بماله الواجد يخزّنها بالاعدادي
أنا أبشرك ما والله علينا من تجايرها
إلى هبت هبوب سهيل ماشاوفت مقعادي
إلى جتنا علوم الخبت والطاروح زايرها
شبكله حر ما يوصف ولا يذكر لحسادي
0طويلٍ عاتقه وأشقر وعينه حيل شاترها
وحش صافي بعد وافي بطول وعرض يزدادي
تراه المرتكز بالوصف والجنحان مخرها
جليل الكف والمنسر طويل اجناح من غادي
سراويله على وكره حصيل الريش خاسرها
غرض صقّار متمرس ترى شاطر وبوكادي
هواء بالي ترى هذا وبذراعي واشمرها
وشوف البر والد له وشوف الطير هدادي
وشوف الصاحب النشمي وفيضه طار زاهرها
وشوف الشبة الحلوه على هاذيك الانفادي
يا بن فوزان تنشدني قصايدكم وش أخرها
الا يا صاح لو تطلب أنا ممنون سدادي
