يا اللَّه انا طالبك ستر وسلامه
لاجا حساب النفس فالحشر والهول
انك تعدينا البلا والندامه
لاجا نهار فيه سائل ومسؤل
لا نزلوني وسط قبر وظلامه
عسى عملنا في تواليه مقبول
وانا نظمت الشعر واعرف نظامه
واميز المعنى على كل مدلول
اصيغ معنى البيت واعرف ختامه
واقول من طب البحر يجذب اللول
البحر غصته ما نهاني ارتطامه
بحر القصيد اللي من القلب منقول
اقولها ولا رضيت الملامه
وماني من اللي مثل ما قيل مجهول
خير الرجال اللي قليل كلامه
لا مادح نفسه ولا مكثر القول
احد مشى في الارض شرق وشامه
ومجرب الدنيا على العرض والطول
واحد سقيم الراي مابه شهامه
هذاك يبقى في لياليه مغلول
واحد يجاملني ولابه كرامه
متمصلح بالناس والهرج معسول
والناس وان شافتك طير العدامه
وانته فقير قالوا الطير مقتول
وأن زاد مالك زودك العلامه
ويزيد حبك عند صاحي ومهبول
المعتبر في الناس يهني منامه
قانع قنوع وكل ما قال معقول
والرجل يمشي لين تتعب عظامه
ولا يحسب ان المرجله جات بسهول
ولابد للإنسان لو طال عامه
انه يدور له مخاليص وحلول
الموت غفله ثم بالقبر قامه
ولابد ما يذهب الى القبر محمول
