يا بدر مالومك وعبرتك برهان
على وفاك ومعدنك يالحصاني
وفاك واخلاصك وحبك لسلمان
بيّن وثابت من قديم الزماني
وانا بعد ببكي على طير حوران
واهل غيم الحزن بين المحاني
دمع حبسته للفرح مير سبحان؟
سبحان من شانه على كل شاني؟!
بحر من الأحزان من غير شطآن
قام يتلاطم بي وقام يغشاني
خذاني لحالي وانا اخذت الاحزان
وغرقت فيه وموج حزنه غطاني
نبكي فهد نبكي سلايل كحيلان
والناس لجت من بكاها الاذاني
رمز لفعل الخير واعمال الاحسان
الله ماغير مسخره للحساني
يعمل بصمت وكل فعله على شان
يبي رضا الله مايبي شي ثاني
غلاه بقلوب المخاليق هتان
من كثر ما له من يدين وحناني
وهذي بشاره من علامات الايمان
الله محبب فيه قاصي وداني
كم واحد يولد والى مات ما بان
ماتفقده غير المره والاواني
والا فهد فقده على كل الاوطان
فهد نهار مفارقه مهرجاني
فهد نهار مفارقه عرس الاحزان
نجم نهار مفارقه شكل ثاني
تدفقت هالناس من كل الاوطان
من كل فج جابها الحزن عاني
اطفال وايتام ومشايخ واعيان
تسابقوا بالحب كف الحصاني
طاحت عقل وبشوت وانفاس وامتان
قامت تداحم لين ضاق المكاني
انا عزايه شوفتي شوف الاعيان
شفت التفاف الشعب صدق وتفاني
الين صارو قلب في صدر سلمان
وعيونهم.. صارت لدمعه مواني
الله يلهمنا الصبر هو والايمان
ويجبر عزاء الليث.. الحسام اليماني
مصابكم مصابنا يا كحيلان
والله يعينك ياوسيع البطاني
ياسيدي لله في دبرته شان
وحكم القدر نافذ على كل شاني
اقفى خفيف غير من فعل الاحسان
وعقب فعول كل ابوها سماني
نرفع يدينا ونتضرع لمنّان
