معقووول!
فوزية بنت ناصر النعيم

ياكثرها الأمسيات الشعرية هالأيام اللي يسوونها الشاعرات المخضرمات ما تصدق الوحدة تقول كلمتين بقافية وحدة الا وتعلن للناس انها صارت شاعرة وتدعوهم لأمسيتها في أحد المراكز اللي تتبنا المواهب الصاعدة «مدري منين جت صاعدة» بس أكيد نسبه إلى السطح لانه أعلى مكان في المنزل.. المهم الوحدة مننا اللي ماتفهم من الشعر شيء اذا ضاق صدرها راحت لحدى هالأمسيات وقامت تضحك لين يجيها فتاق.. لا تلومونها ياجماعة لان الأمسيات الآن صارت مكان للضحك والمتعه.. في ذاك اليوم جت شاعرة ودخلت علينا وكنا في جلسة كبيرة والله اني حسبتها طاووس من مشيتها.. قالت أنا شاعرة وودي تسمحون لي أقول بعض قصائدي عشان آخذ رأيكم قبل اصدار الديوان «ياولد صار فيها ديوان بعد؟!!» وقفت الحرمة وقامت تشاور بيدينها وفجأة قالت: من قلبي «أي لفيو» ومن قلبي «مسيو» ترى هذا انجليزي وكلنا طارت عيوننا بعدين قالت ميبي احبك وميبي اخليك.. الحقيقة الوجية صارت حمراء من شدة الاحتقان كلنا ودنا نضحك بس خفنا تهجونا بقصيدة.. التفت على أم طارق وقلتلها وش ذا الشعر يا أم طارق؟ قالت عادي أهم شيء الاخلاق.. والتفت على أم سليمان وعلى طول قالت يابنت الحلال يمكن انها مسويه القصيدة في أحد الدول الأوربية عشان كذا صار عندها خلط بين اللغات.. قالت فاطمة العيارة اثر الوحده تقدر تصير شاعرة بها البساطة.. زين اسمحو لي يا جماعة انا عندي قصيدة ممكن اقولها.. قوليها يا فاطمة وش معنى انت كل الدنيا شاعرات قالت فطوم: يوم فكيت ذابن ارتعش هاندي وطاح.. الله على هالكلمات الرنانة وين انت يا راشد ابن جعيثن تسمع الشعر اللي يبط الكبد.. المهم ذاك اليوم جانا دعوة من احد المراكز لحضور أمسية شعرية لشاعرات واعدات مدري صاعدات المهم يوم قرأت الأسماء والا وحده منهن كنت اعرفها أيام الدراسات العليا بالمتوسطة أكثر ماترسب بالنصوص وشلون صارت شاعرة ما ادري.. ورحت وشفت وسمعت وعينك ماتشوف الا النور اللي تدير الأمسية يوم شافت كلن يجيب من رأسه صوت قالت وأنا بعد عندي قصيدة كتبتها بأمي اسمعوها.. أمي ياكل الحنان.. أمي ياكل الأمان... والله العظيم هذي أغنية لرباب غنتها وحنا في الابتدائية.. ناظرتها وحدة من الشاعرات وهي تطنز عليها وعيونها تقول الله لا يهينك اسكتي.. قالت أنا عندي ثلاث قصائد وابيكم تختارون وحدة منهن عشان وقتي مرة ضيق ومضطرة اطلع القصيدة الأولى عن الحبيب وش رأيكم؟ طيب والباقي عن ايش وشكل الحرمة ماعندها غيرها القصيدة قالت أنا أفضل اقول هالقصيدة احسن.. والله خلتنا نختار!! بس عاد ماودي أقول وشي قصيدتها لا تزعل علينا.. المهم انها جلست لآخر السهرة يعني ما كان عندها شغل ولا شيء.. يا ناس.. يا هووه.. معقولة اللي قاعد يصير؟!!!