يا لله يلّي كلنا مرتجينه
يا واحد ما خاب منهو ترجاه
نسألك ما غيرك احد سائلينه
يا لله يارب المخاليق يا لله
عبدك ياربي رافع لك يدينه
يدعيك من قلبه ومخلص لك دعاه
حزين ونفسه يا إلهي حزينه
على اللي في غفله فجعنا بفرقاه
ابو عبيد ووينه اليوم وينه
الشاعر اللي خذ من البحر معناه
الشاعر اللي كلنا خابرينه
الوافي اللي نادر تشوف حلياه
فقيد شعر الرد ومتابعينه
شاعر مطير اللي تنومس سجاياه
ان اندفن فقلوبنا دافنينه
وان مات ما ماتت مع الناس ذكراه
عبدالله ويا كثرهم فاقدينه
ويا كثر دمع في غيابه نثرناه
يا لله تلهمنا الصبر والسكينه
وتجعل يا ربي جنة الخلد مثواه
يارب تغفر له ويا لله تعينه
في يوم ما للعبد يا كود مولاه
يا لله يلّي كلنا مرتجينه
يا واحد ما خاب منهو ترجاه
