لاحت بروق القصايد من هجوس داخليه
زلزلت عرش الضماير واعتزيت وقمت صاحي
حنت رعود القوافي وامطرت باشعار حيه
ليلةٍ ما نامت عيون بها حتى الصباحي
ودرهمت الأفكار في مدح الرجال اهل الحميه
الرجال أهل العزيمه والعروبه والكفاحي
الرجال اللي لهم تاريخ وعزومٍ قويه
افتخر في مدحهم والمرجله نعم السلاحي
الله أكبر يا قصيدي ناوي بالطيب نيه
يا عسى من يمدح أهل الطيب توفيق ونجاحي
من يقدم طيب يلقى طيب يا نعم الوصيه
قلتها ويقولها أهل العرف ورجال الصلاحي
اغتنم فرصة زمانك والليالي سرمديه
ما يحوز المجد من عزمه وهقواته شحاحي
الصبر في ساعة الشده وحزات المنيه
كنز غالي والعواقب طيبه واعظم وشاحي
الردي جنب طريقه رفقته غبنٍ واذيه
رفقته هم وعذاب وغم مع سمٍ ذحاحي
ورفقة الطيب غنيمه والغنيمة الأولية
طاعة المولى عظيم الجاه في كل النواحي
اشهدٍ ان الشعر في مدح القروم أغلى هديه
والتحيه عد برق في جبين الغيم لاحي
