تحس بنظرته فقدان موطن
تعوّد يرتمي دوم بترابه
تحس إنه فقد انصَاف عمره
وضاع الوقت عند أعتاب بابه
تحسه صمت في جوف الليالي
وإن الحزن زاره والتجا به
فقد اغلى البشر ياصمت شاعر
عجز شعره عن المعنى وكتابه
يتم الأب يا حزن القوافي
ومعنى الفقد في عمره وشبابه
فقد يدٍ تدله أو تعينه
فقد كلمة عن الحق وصوابه
فقد ماضي يحس انه يحبه
وحاضر ضاع في حلمه وصوابه
أبوه اللي تعود في عيونه
على صدق الحكي لو ما حكى به
ابوه اللي سند ظهره وعمره
على كتفه ونوخ به ركابه
ابوه اللي رسم دربه وحلمه
واعظم شي للطفل انتسابه
رحل مثل الزمان اللي تركنا
ومثل الدمع في وقت انتحابه
اذا شفتم عيونه لا تلوموا
اذا وقته وجرحه اختلى به
اذا شفتم دموعه امسوحها
ترى دمعه حزين الوقت جابه
ترى فقده عظيم ياقوافي
وحتى الشعر يوقف عند بابه
