يا شايل بقلبه من الحقد أطنان
الحقد ما ياكل سوى قلب راعيه
تمشي وبين الناس واشي وفتان
كم مرة فرقت غالي وغاليه
كم واحد غرّيته بحالي لسان
تضحك عليه بكلمة الطيب تغريه
تظهر صداقة له وتضحك بالأسنان
وقلبك من ألوان المكر فيه ما فيه
مثلك مثل شيطان في ثوب إنسان
أضمرت شرك لين بانت مواريه
كنك سواة الداب يضحك بنيبان
والموت في جوفه سرى في مساريه
شايل بصدرك قلب بالغل مليان
أسود سواد الليل والحقد ماليه
فرّقت بين فلان وفلان وفلان
حسبي عليك الله ياللي تسويه
ترتاح لا فرّقت ما بين الاخوان
مَدْري وش اللي تستفيده وتجنيه
ما تدري أن فوقك يراقبك ديّان
يعلم بسرك لو عن الناس تخفيه
راع النميمة دايم الدوم خسران
دربه عوج لا شك معروف تاليه
بين الملا ما له صديق وخلان
كل تعوذ منه اليا مر طاريه
الله فرّق ما بين مبصر وعميان
واللي زرع زرع تحصده أياديه
في ساعة يحشر بها الإنس والجان
لا بد ما ربي بفعله يجازيه
