خير وابرك ما ابتدي به كلامي
ذكر الولي منشي السحاب المراهيش
الواحد المعبود رب الانامي
اللي ضمن لبنادم الرزق والعيش
مشبع ومروي كل جايع وظامي
متكفل في عاقل الناس والديش
ابا اطلبه بقدوم شهر الصيامي
شهر عليه كبود الامّه معاطيش
يقبل صيامي به ويقبل قيامي
من غير لغو وغير غلوٍ وتشويش
وللمملكه حق الفخر والتسامي
غصبٍ على اللي يلبسون الطرابيش
من حب داره يا ملا ما يلامي
من لا يحب الدار عايش على ويش؟!
يا دار لك عزّه وقدر ومقامي
بقلوبنا يا دار منقوش تنقيش
في ظل حكّامٍ حشامٍ كرامي
للعند نِد وللرفاقه مباهيش
قلته ولا كلٍ يثير اهتمامي
في خير وبنعمه من الناس مابيش
يالله رضاك ختام مسك الكلامي
والشوك ماله غير روس المناقيش
