يا مودع الكنه على دربك اشباط
ذي حالة الدنيا ودقق حسابك
في طرقتك ملزوم تحرص وتحتاط
العمر فرصة لا تضيع شبابك
تجلس تلوم النفس ويصيبك احباط
ويفرح عدوٍ غافلٍ مادرابك
جرح الزمن ينزف ولا هوب ينخاط
والحل برّق في خطاك وصوابك
للشوك مناقشه وللجمر ملقاط
العقل نعمة فيه رتب جوابك
كد قيل لا تحرص ولا تفرط افراط
واحذر هوى نفسك وكرم جنابك
عن خوة الواشي وعن كل خراط
يشب نار المهزلة في ثيابك
من شدّه الغفلة على قلبه ارباط
تخسر حضورك مار تكسب غيابك
والكمه اللي ما بها شك وغلاط
اللي حكى لك في غيابك حكى بك
