يا راكب سمح المذرع من القود
اشعل طويل المتن نبه شناحي
يشدي لهيق جفله حس بارود
عليه زعر منومل المحل فاحي
وشديده من عاج والنطع ماهود
ومفصل باجواز ريش المداحي
تلفي أخو عذرا من الربع مقصود
زبن الهليب اللي له المنع شاحي
قله ترى دنياي ما تازن العود
مربيات ومر كونه صباحي
وافطن ترى دنياك خوانة عهود
صفاقة عرقوبها بارتماحي
وياشيخ ما دامت لكسرى وداوود
كم دور ربع كيفوا به وراحي
ياما صبرنا يا اخو عذرا على الكود
نصبر ولا نطلب يدين شحاحي
عزي لمن مثلي من الغبن ملهود
وعن ما تريد النفس يقصر جناحي
من يوم بانن المغاتير بالسود
بطل جهلنا يوم بان العرضاحي
ويا شيخ يا مبعد عنا كل مضهود
يا مزبنه وان ضاق فيه البياحي
يا ما لجينا بك عن الحيف والزود
يوم انها قلت علينا المشاحي
والله ما دامي على القاع ماجود
ما انساك يا طير السعد والفلاحي
